Um Skólann

Upphaf. Tónlistarskólinn í Fellabæ var stofnaður árið 1994 og fyrsti skólastjórinn var Rosemary Hewlett. Ármann Einarsson tók við skólastjórn árið 1995 og gengdi því starfi til vors 2004, þá tók Drífa Sigurðardóttir við skólastjórastarfinu og hefur gengt því síðan.

Námskrá. Kennt er eftir aðalnámskrá tónlistarskóla sem má nálgast á www.stjornarradid.is og þar má einnig finna fleira efni sem tengist tónlistarkennslunni s.s hljóðfæranámskrár og fl. https://tonfellabae.fljotsdalsherad.is/is/forsida/skolanamsskra. Þar sem nemendur eru með fjölbreyttar þarfir þarf stundum að bregða út frá hefðbundinni námskrá og aðlaga námið að hverjum og einum, en í grunninn er stuðst við aðalnámskrána.

Fullorðnir. Fullorðnir einstaklingar hafa aðgang að öllu tónlistarnámi við skólann en nemendur að 23.ára aldri sitja ávallt fyrir í laus pláss.

Forskóli. Forskóli er í boði fyrir nemendur í 1.bekk Fellaskóla og er það samstarfsverkefni þessara tveggja skóla.

Söngnám. Í boði er bæði rythmiskt-og klassískt (einsöngur) söngnám. Einkatímar fyrir grunnskólanemendur er í boði þegar komið er upp á miðstig eða í 5.bekk grunnskóla. Fyrir nemendur í 2 - 4.bekk er hægt að sækja um að vera í sönghóp.

Hljóðfæranám. Kennt er á hin ýmsu hljóðfæri og í rythmisku námi er kennt á rafgítar, trommur/slagverk, rafbassa og hljómborð. Klassísku hljóðfærin eru píanó, orgel, harmonika, blokkflauta, þverflauta, klarinett, óbó, túba, trompet, fiðla, lágfiðla, selló, klassískur gítar, klassískt slagverk. 

Tónfræði og tónheyrn eru fylgigreinar alls tónlistarnáms og er yfirleitt miðað við að tónfræðinám hefjist um 10-12.ára aldur.

Tónlistarsaga og hljómfræði eru fylgigreinar á mið-og framhaldsstigi

Stigspróf eru í samræmi við kröfur aðalnámskrár sem prófanefnd tónlistarskóla hefur umsjón með, profanefnd.is eru tekin þegar viðmiðum þeirra er náð. Innanhússtig eru tekin á milli grunn-mið-og framhaldsprófa þ.e. 1,2,4,6 stig.

Almennt um skólastarfið. Mikið og blómlegt tónlistarlíf er í tónlistarskólanum og innan veggja hans ríkir góður andi. Stefna skólans er að sem flestir sem þess óska fái tækifæri til að læra tónlist og hefur verið öflugt starf með hljómsveitir og sönghópa í skólanum. Á tónleikum er reynt eftir fremsta megni að bjóða öllum þeim sem stunda nám við skólann og það kjósa að koma fram og því höfum við tvískipta tónleika þ.e. eina klassíska og eina rythmiska, svo eru sér tónleikar fyrir söngnemendur, einn á hvorri önn. Utan hefðbundinna tónleika eru tónfundir fyrir hvert hljóðfæri einu sinni á hvorri önn. Í tengslum við dag tónlistarkólanna sem er í febrúar ár hvert eru sameiginlegir tónleikar nemenda í klassísku og rythmisku námi og er þá stiklað á stóru á báðum stigum. Á fyrri árum skólans voru settar upp söngsýningar  á borð við Stuðmannahopp, Bítlashow, Abbashow og Ómar ómar undir styrkri stjórn Ármanns Einarssonar fyrrverandi skólastjóra,  nú á síðari árum hafa t.d. verið tónleikar helgaðir starfi Ingimars Eydal, Þorsteins Eggertssonar, Sálarinnar hans Jóns míns, Bubba Morthens  svo eitthvað sé nefnt.

Húsnæði. Skólinn er staðsettur á efstu hæð í Fellaskóla og hefur þar þrjár stofur til umráða. Skólinn hafði  aðgang að húsnæði í kjallara skólans sem var tekið í endurnýjun lífdaga fyrir nokkrum árum, og var fyrir hljómsveitaræfingar og einnig fór slagverkskennslan þar fram ásamt því að vera notað sem fjórða kennslastofan þegar hana vantaði,  en vegna ónægra brunavarna hefur verið bannað að nota húsnæðið. Haustið 2022 fékk Fellaskóli Leikskólahúsnæði Hádegishöfða til umráða og fékk þá Tónlistarskólinn handavinnustofuna sem liggur að hlið tónlistarskólans til umráða og þá vænkaðist nú hagur okkar heldur þar sem þar er hægt að vera með stærri hópa í einu og kenna t.d. tónfræði og fleira sem krefst aukins rýmis.

Samstarf við Fellaskóla. Í gegnum árin hefur skapast mikið og gott samstarf við Fellaskóla og er mikill ávinningur fyrir báða aðila af slíku samstarfi. Nemendur Fellaskóla eru yfirleitt um 70 - 75% af heildarnemendafjölda og geta þeir sótt sitt tónlistarnám á skólatíma sem gerir það að verkum að nemendur eru þá búnir með sitt tónlistarnám á skólatíma enn þurfa ekki að sækja það eftir skóla. Tónlistarskólinn kemur að undirbúningi  árshátíðar grunnskólans og einnig oft að vinnu og uppgjöri sem fram fer á þemadögum, jólaundirbúningi, Litlu jólum og hverju því sem til fellur og þarfnast tónlistarflutnings einhvers konar.

Stefna og markmið. Stefna Tónlistarskólans í Fellabæ er að allir þeir sem óska þess að vera nemendur hans eigi þess kost. Styrkja nemendur til náms með fjölbreyttum kennsluháttum sem hæfa hverjum og einum með það að markmiði að efla nemandann í því námi sem hann er í hverju sinni. Undirbúa nemendur til áframhaldandi náms og almennrar tónlistariðkunnar að lokinni veru þeirra í skólanum.

Skólastjóri er Drífa Sigurðardóttir.

Tónlistarskólinn í Fellabæ.
Sími: 4700 646
Netfang: drifa.sigurdardottir@mulathing.is