Jólatónleikar.

Mikil og góð hátíðarstemning ríkti á tónleikunum okkar í gær þar sem jólaandinn sveif um allt með jólatónlistinni sem ómaði um loftið.

Þessir jólatónleikar marka stórt skref í sögu Tónlistarskólans í Fellabæ en þetta voru þrítugustu jólatónleikarnir hans þar sem hann var stofnaður haustið 1994 og er þetta skólaár því afmælisár hjá okkur.

Við byggjum okkar jólatónleika þannig upp að eingöngu er um samspil (tveir eða fleiri) að ræða og blásturs-og strengja hljóðfæri fá aukið vægi sem og söngur.

Einn tónfræðihópur frá Suncönu var með atriði þar sem t.d var spilað á bjöllur, flautu og klukkuspil svo eitthvð sé tiltekið, og var popp-jólalagið Nei, nei, ekki um jólin fært í nýjan búning.

Í lokaatriðinu voru um það bil 30 nemendur sem komu fram ásamt kennurum og mátti þar heyra í fiðlum, gíturum, harmonikum og flautum svo eitthvað sé nefnt, einnig voru glæsilegir einsöngvarar og kór sem leiddu lagið áfram. Lagið var Hátíðin heilsar (Happyxmas) og stjórnaði Margrét Lára öllum hópnum með glæsibrag. 

Við þökkum öllum þeim fjölmörgu sem komu til okkar í gær hjartanlega fyrir komuna og öllum nemendum okkar fyrir frábæra frammistöðu og hversu stilltir og prúðir allir voru á meðan tónleikunum stóð.

Það er ekki sjálfgefið að vera í tónlistarnámi og gleðjumst við yfir hverjum þeim er velur það að læra tónlist hjá okkur og reynum við að taka við hverjum þeim sem það vill.

Við óskum öllum okkar velunnurum gleðiríkra jóla og farsældar á komandi ári með þakklæti fyrir gott samstarf í gegnum árin öll.