Jólatónleikar

Gleðin skein úr hverju andliti og eftirvænting ríkti hjá nemendum stórum og smáum sem komu fram á jólatónleikunum okkar sem haldnir voru í gær.

Eðlilega var það jólatónlist ýmiskonar sem átti sviðið þó inn á milli leyndust ó-jólalög eins og við köllum það, og sýnt var fram á hvernig hægt er að gera ó-jólalag að jólalagi.

Það er gaman að segja frá því að það voru flutt þrjú frumsamin lög eftir nemendur og það er svo frábært þegar nemendur eru að semja og skapa tónlist. Einnig sömdu nemendur líka texta við lögin.

þetta voru lögin Um bjarta jólanótt eftir nemendur í 4.bekk með aðstoð Berglindar og Öysteins og Jólunum vil ég eyða með þér, lag og texti eftir Ínu Berglindi Guðmundsdóttur sem útsetti lagið með aðstoð frá bekkjarsystrum sínum og samnemendum í tónlistarskólanum og I put my flowers away, lag og texti eftir Gyðu Árnadóttur sem útsetti ásamt samnemendum og Öystein hjálpaði þeim í báðum þessum lögum.

Þetta var það síðasta sem um er að vera í tónlistarskólanum þetta skólaárið og aldeilis frábært að ljúka starfinu með svona fínum tónleikum. Nú förum við í jólafrí og er síðasti dagurinn okkar fimmtudagurinn 15.desember og við óskum nemendum okkar og foreldrum gleðilegra jóla og farsældar á komandi ári og við hlökkum til komandi samverustunda í heimi tónlistarinnar.

Kennsla á nýju ári hefst miðvikudaginn 4.janúar 2023.