Landsmót SÍSL

Tónlistarskólinn í Fellabæ sendi einn nemanda á mótið hana Rögnu Sigurlaugu þverflautuleikara og var hún eini nemandinn af austurlandi og reyndar af landsbyggðinni allri fyrir utan Þorlákshöfn og Reykjanesbæ sem var þátttakandi á landsmótinu.

SÍSL samband íslenskra skólalúðrasveita skiptist í A-sveit sem er fyrir þá sem eru að stíga sín fyrstu skref   B-sveit fyrir nemendur á grunnstigi og þar um kring og C-sveit fyrir lengst komna nemendur. 

Þetta var landsmót B-sveita en samband íslenskra skólalúðrasveita skiptir landsmótunum niður þar sem fjöldi þátttakenda væri annars of mikill, en það voru um 200 þátttakendur á mótinu.

Mótið var glæsilegt og þátttakendur lærðu margt nýtt og tóku þátt í allskonar uppákomum sem tengjast svona samveru.

Þátttakendum var skipt upp í hljómsveitir sem æfðu sér en sameinuðust í stórsveit í lok móts.

Mótið endaði svo með glæsilegum stórtónleikum í Háskólabíói sunnudaginn 19.október og að loknum tónleikunum fengu allir hljóðfæraleikarar hressingu áður en þeir héldu heim á leið glaðir með afraksturinn.

Það er ljóst að svona mót hafa mikið að segja fyrir nemendur, að hitta aðra, æfa með stórri lúðrasveit, öðlast reynslu og safna í kunnáttu bankann.

Við óskum Rögnu Sigurlaugu til hamingju með þátttökuna og Stefaníu Þórdísi systur hennar þökkum við fyrir að vera Rögnu innan handar á mótinu fyrir okkar hönd.