Skólalok 2021

Hrafnhildur, Ellen, Gyða, Angelika og Sigríður  að lokinni afhendingu skírteina fyrir áfangaprófin sín.

Ekki er hægt að segja að síðastliðið skólaár hafi verðið með hefðbundnum hætti þar sem covid setti oft strik í reikninginn, og voru t.d. engir tónleikar haldnir fyrir áramót.

En aldrei hafa jafnmargir nemendur tekið stigs-eða áfangapróf við skólann og í vetur og kannski var tímanum öðruvísi varið en ella en alla vega tóku 16 nemendur stigspróf og 7 nemendur tóku áfangapróf. 

En þó engir tónleikar hafi verið fyrir áramót tók að birta til er leið á árið 2021 og og voru fyrstu tónleikar skólaársins haldnir 10.febrúar í Fellaskóla og voru það rithmiskir tónleikar þar sem komu fram hljómsveitir og sönghópar. Engir gestir voru á þessum tónleikum.

24.mars vorum við með klassíska tónleika í Fellaskóla og var að þessu sinni foreldrum boðið til leiks sem var afar ánægjulegt.

Að kvöldi 24.mars stóð Hlín Pétursdóttir Berhens fyrir söngtónleikum í Egilsstaðakirkju þar sem nemendur hennar úr báðum skólum sitthvoru megin fljóts komu fram og fluttu tónlist t.d. tengda föstu. M.a. var fluttur hluti passíusálma Hallgríms Péturssonar. 

Rithmiskir söngtónleikar að viðstöddum gestum voru haldnir í Egilsstaðakirkju 28.apríl og voru það nemendur Öystein sem þar komu fram.

Vortónleikar skólans voru síðan haldnir í Egilsstaðakirkju 12.maí og voru þeir tvennir að þessu sinni, þeir fyrri kl:16:30 og þeir síðari kl:17:30. Þetta voru veglegir  tónleikar þar sem fjölbreytt tónlist hjómaði og þar sem við gátum í fyrsta skipti tekið á móti gestum án mikilla takmarkanna var hátíðarstemning og gleði ríkjandi.

Við höfum aldrei haldið svona marga tónleika í Egilsstaðakirkju en ástæðan er sú að þar gátum við tekið á móti gestum án mikilla takmarkanna eins og áður hefur komið fram og kannski verður þetta framtíðin að einhverju leiti, hver veit.

Kennarar við skólann verða þeir sömu næsta skólaár og voru í vetur og því ber að fagna. Einn kennari bætist reyndar í hópinn og kennir nokkrum byrjendum píanóleik. Það er ekki sjálfgefið að tónlistarskólar dafni og stækki með hverju misserinu, en það byggist að öllu leiti á kennurum hans. Í okkar tilfelli er mannauðurinn slíkur og vandi væri að finna annan eins hóp, þeim ber að þakka fyrir sína frábæru vinnu í þágu skólans. Sjá má hér á heimasíðunni hverjir verða við störf við skólann á næsta skólaári.

7 nemendur tóku stigspróf í vetur og eru þetta þær, Hrafnhildur Margrét Vídalín sem tók miðpróf á píanó, Ellen Gréta Smáradóttir sem tók grunnpróf á píanó, Gyða Árnadóttir, Emilía Anna Óttarsdóttir og Rebecca Lísbet Sharam tóku allar grunnpróf í rithmiskum söng og að lokum tóku þær Angelíka Liebermeister og Sigríður Þorvaldsdóttir grunnpróf í klassískum söng. Við óskum þeim sem og öllum öðrum okkar nemendum sem tóku próf til hamingju með áfangann.

Á myndinni sem fylgir þessari frétt má sjá nemendur er tóku áfangapróf en á hana vantar þær Emilíu og Rebeccu sem voru fjarverandi á skólaslitunum.

Við í Tónfell þökkum nemendum, foreldrum og starfsfólki Fellaskóla fyrir afar ánægjulegt og farsælt samstarf í vetur og hlökkum til komandi skólaárs sem vonandi verður ekki með alveg sama hætti og það sem er að líða þó þegar leið á hafi hlutirnir komist nær því að verða hefðbundnir.

Þrátt fyrir allt þá höfum við hér öll lært mikið af þessu svokallaða ástandi þar sem oft þurfti að skipuleggja kennsluna upp á nýtt og bregðast við ytri aðstæðum með litlum fyrirvara. Nú kunnum við að bregðast við og það mun hjálpa ef samskonar aðstæður koma til. 

Hafið það sem allra best í sumar og við sjáumst aftur í lok sumars tilbúin að takast á við hinn fjölbreytta heim tónlistarinnar.

(Við minnum á skráningar í skólann, en fyrri nemendur sitja fyrir í nám og þar sem afar lítið er um laus pláss er mikilvægt fyrir okkur að fá vitneskju um hverjir ætli að halda áfram í námi og að sjálfsögðu vonumst við að sem flestir geri það)