Undir sömu stjörnu

Hátíðarstund var á Eskifirði í gær þar sem nýstofnuð Þjóðarópera okkar hélt óperutónleika ásamt Sinfóníuhljómsveit Austurlands og gestum og nýstofnuðum þjóðaróperukór skipuðum söngfólki úr heimabyggð ásamt félögum úr Kammerkór Norðurlands, að viðstöddu fjölmenni, menningarráðherra og bæjarstjórum Múlaþings og Fjarðarbyggðar en sú síðarnefnda skrifaði undir samstarfsyfirlýsingu við verkefnið sem er frábært fyrir menningarlífið hér eystra.

Handritsgerð og leikstjórn var í höndum Ólafs Egils Egilssonar.

Söngvarahópur Óperunnar er skipaður Gunnari Birni Jónssyni, Hildigunni Einarsdóttur, Kristínu Einarsdóttur Mantyla og Kristjáni Jóhannessyni ásamt gestasöngvaranum Hlín Pétursdóttir Behrens sem er söngkona og söngkennari hér hjá okkur á Austurlandi.

Þetta voru aðrir tónleikarnir í þessari tónleikaröð, en þeir fyrstu fóru fram í Hofi á Akureyri 18.október síðastliðinn og síðan verða tónleikar haldnir í Hljómahöllinni í Reykjanesbæ og Skálholtsdómkirkju og er það heimafólk á hverjum stað sem sér um undirleik og kórsöng en söngvarahópurinn kemur fram á öllum tónleikunum, en gestasöngvarinn kemur líka frá hverjum stað fyrir sig.

Leikararnir Ólafía Hrönn Jónsdóttir og Örn Arnarsson tengdu atriðin listavel saman og sögðu frá tilurð tónlistarinnar og höfunda, og var fyrsta arían frá árinu 1609 úr L´Orfeo eftir tónskáldið Monteverdi og síðasta arían var úr óperunni Ragnheiði eftir Gunnar Þórðarson frá árinu 2013.

En að stóra málinu, það voru fimm nemendur í söng við skólann okkar sem voru í nýstofnuðum Þjóðaróperukór og kennarinn þeirra hún Hlín Pétursdóttir Behrens sá um æfingar og þjálfun og var svo gestasöngvari eins og áður hefur komið fram.

Síðan voru kennarar auðvitað í hljómsveitinni sem hélt öllu frábærlega saman undir styrkri stjórn Richard Schwennicke.

Stórkostlegir tónleikar með frábæru listafólki hvort sem var í söngvarahópnum, kórnum eða hljómsveitinni og við óskum nemendum okkar og kennurum og Hlín innilega til hamingju með frábæran menningarviðburð.