Vortónleikar

Þetta voru síðustu tónleikarnir í tónleikahaldi þessa vors en við skiptum þeim niður til að gefa sem flestum tækifæri til að spila og flestir nemendur hafa spilað á tónleikum í vetur.

Þeim er skipt niður í  tónleika þar sem hljómsveitir og nemendur í rythmisku námi halda tónleika síðan eru söng-og píanó nemendur með sér tónleika og ekki má gleyma öllum tónleikunum sem við höfum haldið á Dyngju í vetur sem og árshátíð Fellaskóla, en þar spila nemendur einnig.

Tónleikarnir voru hinir skemmtilegustu og lagavalið var mjög fjölbreytt sem skapaði þessa skemmtilegu stemningu.

Blásturshljóðfæri voru í aðalhlutverki og það sveif klassískur blær yfir en eingöngu var um samspil að ræða sem voru af öllum gerðum og m.a. var kammerhópur skipaður nemendum í blásaradeild hjá Virág sem fluttu saman Koral eftir J.S. Bach og Vínarvals eftir Shubert, svo voru hljómsveitir undir stjórn þeirra Frikka og Mána sem fluttu klassískt rokk-og popp, Smoke on the Water og Vertu ekki að plata mig. Nemendur í þriðja bekk komu og sáu og sigruðu, en þau spiluðu lagið Signir sól á harmoniku, píanó, tréspil, þríhorn og rafgítar við frábærar undirtektir og ljóst að þar var á ferð tónlistarfólk framtíðarinnar. Einnig var flutt frumsamið lag eftir nemanda í áttuna bekk og það er frábært þegar nemendur eru að semja og flytja sína eigin músik.

Þarna er stiklað á stóru í dagskránni og þökkum við nemendum fyrir frábæra tónleika og kennurum fyrir allan undirbúning og skipulag.

Næsti viðburður hjá okkur eru skólaslitin en þau verða 28.maí næstkomandi og verða auglýst nánar síðar, en þar verða nemendur sem tóku áfangapróf í vor með tónlistaratriði sem og nemendur í klassískum söng.