Fréttir

Síðastliðin þriðjudag fóru nemendur Tónlistarskólans í Fellabæ á Dyngju og héldu tónleika fyrir dvalarfólk og aðra gesti. Það voru nokkrir af söngnemendum Hlínar Pétursdóttur Behrens sem komu fram og sungu jólalög í bland við aðra söngtónlist.

Nú þegar langt er liðið á haustönnina er komin tími til að segja aðeins frá skólastarfinu. Allt hefur gengið samkvæmt áætlun og nemendur skólans standa sig með prýði og bæta sig dag frá degi eins og vera ber. Kennarar eru átta talsins og sinna sínum verkum af natni og kostgæfni. Gítar og píanó eru sem fyrr vinsælustu hljóðfærin en langflestir nemendur eru í söng, bæði popp-og klassískum og fögnum við mjög fullorðnum söngnemendum í tónlistarflóruna okkar, og vonumst til að geta tekið á móti fleirum á næsta skólaári. Í haust hafa nemendur tvisvar sinnum farið á Dyngju og haldið tónleika fyrir dvalargesti ásamt viðkomandi kennurum en við í Tónfell eigum fyrsta þriðjudag í mánuði á Dyngju og skiptast kennarar á að fara með nemendur. Í október fór Öystein með hluta af sínum nemendum og Torvald fór svo nú í nóvember, í desember munu Hlín og Drífa sjá um tónleikana og er það síðasta skiptið á þessu ári. Undirbúningur tónleika er stór hluti starfseminnar sem og undirbúningur fyrir próftökur og tók einn nemandi stigspróf í síðustu viku á klarinett sem við fögnum mjög og óskum innilega til hamingju. Tónleikar verða haldnir 27.nóv næstk og eru það popp-og rokktónleikar, þessir tónleikar eru árvissir og fyrir þá eru settar saman hljómsveitir með nemendum á öllum aldursstigum sem leiða saman hesta sína og flytja íslenska og erlenda dægurtónlist. Undirbúningur hefur staðið meira og minna yfir í allt haust og verður gaman sjá afraksturinn. Að þessum tónleikum loknum tekur við undirbúningur jólatónleikanna sem verða 11. desember. Það eru hefðbundnir hátíðartónleikar með áherslu á samspil/söng ýmis konar og rafmögnun verður í lágmarki. Báðir þessir tónleikar eru í sal Fellaskóla og hefjast kl:18:00 og það eru að sjálfsögðu allir velkomnir og aðgangur er ókeypis. Við þökkum foreldrum sem nýttu sér foreldravikuna okkar en viljum taka fram að foreldrar eru alltaf velkomnir í skólann til okkar. Við þökkum enn og aftur foreldrum/forráðamönnum og velunnurum skólans fyrir samstarfið og góð orð í okkar garð. Eins þökkum við öllu starsfólki Fellaskóla fyrir einstaklega góða samveru og jákvæðni í okkar garð, enda erum við yfirleitt tilbúin að hjálpast að þegar eitthvað er þar um að vera eins og t.d. á þemadögum sem lauk í gær svo eitthvað sé nefnt. Vonumst til að sjá ykkur sem flest á komandi tónleikum.

Kennsla í tónfræðigreinum og forskóli 1. bekkjar hefst 9. september. Haft verður samband við nemendur sem eiga að fara í tónfræði í næstu viku og foreldrum nemenda í 1. bekk verður sendur póstur um skipulag forskóla í lok næstu viku. Fyrsti kennsludagur er miðvikudagurinn 28. september, þann dag og dagana þar á eftir hitta kennarar nemendur sína og í framhaldinu verða sendar út upplýsingar um tímasetn kennslustunda.

Kennarar næsta skólaár verða að mestu þeir sömu og verið hafa nema að Charles Ross verður í ársleyfi. Ráðin hefur verið kennari í hans stað og kemur hann frá Skotlandi sem er skemmtileg tilviljun þar sem Charles er skoti. Sá heitir Jonathan Law og er hann með framhaldspróf í fiðluleik, en einnig kennir hann á víólu og selló. Aðrir kennarar verða sem hér segir, Berglind Halldórsdóttir kemur til baka úr fæðingarorlofi og kennir hún á blásturshljóðfæri og einnig verður hún með forskólahópinn og tónfræði. Drífa Sig kennir á píanó og söng. Friðrik Jónsson (Frikki) kennir á gítar, rafgítar og bassa. Hlín Pétursdóttir Berhens kennir söng og tónfræði. Torvald Gjerde kennir á píanó, harmoniku og söng. Wesley Stepens kennir á slagverk og túbu (barinton horn) Öystein Gjerde kennir á gítar, rafgítar, ucculele, bassa og söng. Við höfum nokkur laus pláss á blásturs-og slagverkshljóðfæri og einnig á fiðlu og hvetjum áhugasama að sækja um með því að senda tp á drifa@fell.is. Við minnum á að fullorðnir eru velkomnir í skólann en grunnskólanemendur og nemendur í ME sitja fyrir í nám. Nú í ár er í boði nám fyrir fullorðna í söng og er það Hlín Pétursdóttir Berhens sem sér um það og verður námið sniðið að þörfum hvers og eins. Gjaldskrá skólans má finna á heimasíðu Fljótsdalshéraðs. Við hlökkum til að hitta nemendur, en skólinn hefst 28. ágúst og vonumst við til að veturinn verði áhugaverður og skemmtilegur sem og endranær.

Fyrsti kennsludagur næsta skólaárs verður miðvikudagurinn 28. ágúst. Skóladagatal fyrir næsta skólaár verður sett inn á heimasíðuna í næstu viku. Við minnum svo alla sem ekki eru þegar búnir að sækja um eða staðfesta skólavist að gera það sem fyrst.

Nú fara í hönd uppskeruhátíðir Tónfell og verða með eftirfarandi hætti. Föstudaginn 10. maí kl:18:00 í Egilsstaðakirkju.: Píanó-tónleikar. Þriðjudaginn 14 maí kl:17:30 í Egilsstaðakirkju.: Söng-tónleikar. Miðvikudaginn 15. maí kl:18:00 í sal Fellaskóla.: Vor-tónleikar. Það eru allir hjartanlega velkomnir og aðgangur er ókeypis inn á alla viðburði. Hlökkum til að sjá ykkur. Nemendur og kennarar.

Minni á áður auglýsta tónleika sem verða haldnir næstkomandi miðvikudag kl:18:00. Það eru allir hjartanlega velkomnir og aðgangur er ókeypis.

Nú er að verða liðin um það bil mánuður af árinu 2019 og þá er ekki úr vegi að fara að huga að fyrstu tónleikum ársins, en það verða haldnir tónleikar í lok febrúar í tilefni Dags Tónlistarskólanna sem var 9. febrúar. Á tónleikunum verða fjölbreytt atriði, einleikur, samspil, samsöngur, sem sagt sýnishorn af ýmsum tónlistarstefnum og það verða nemendur af öllum aldursstigum sem koma fram hvort heldur er um lengra komna eða þá sem styttra eru á veg komnir. Annars er allt gott að frétta hjá okkur í Tónfell og lífið gengur sinn vanagang með spili og söng eins og lög gera ráð fyrir. Einn nýr kennari hóf störf hjá okkur nú um áramótin og heitir hún Hlín Pétursdóttir Behrens og er söngkennari. Hún er með fullorðna nemendur og þá sem lokið hafa einhverju áfangaprófi svo er hún með elstu söngnemendur Öysteins í hóptíma einu sinni í viku. Við vonumst til að hún hafi tök á að bæta við sig nemendum á komandi hausti og fögnum komu hennar til okkar. Berglind Halldórsdóttir er svo komin til baka til okkar heldur fyrr en áætlað var þar sem blásturskennarinn sem við höfðum ráðið hætti um áramótin og hún var svo góð að koma fyrr úr fæðingarorlofinu sínu og bjarga okkur og kunnum við henni bestu þakkir fyrir. Á meðfylgjandi mynd má sjá fjóra af kennurum skólans á jólatónleikum 2017.

Jólatónleikar Tónlistarskólans í Fellabæ verða haldnir í sal Fellaskóla miðvikudaginn 12. desember kl:18:00. Fram koma nemendur af öllum aldursstigum og flytja okkur fallega og hátíðleta tónlist sem hæfir aðventunni. Það eru allir velkomnir og aðgangur er ókeypis.

Á morgun, miðvikudaginn 21. nóvember kl:18:00 verða nemendur í rythmisku námi með popp-og rokk tónleika. Flutt verða lög úr ýmsum áttum. Það eru allir velkomnir og aðgangur er ókeypis.